Գիտեի՞ք արդյոք, որ մի շարք  հայտնի գյուտեր հայերն են ստեղծել։ Ո՞վ կարող էր պատկերացնել։ Տպիչ սարքը, ֆենը՝ առանց որի կանայք չեն պատկերացնում իրենց կյանքը, ինքնաշարժերի ավտոմատ փոխանցման տուփը, ջրի ծորակը և այլ գլուխգործոցներ պատկանում են հայերին գրչին։ Այս մասին ներկայացված է Ստեփան Պարթամյանի հեղինակած «Ամերիկահայության ներդրումը Միացյալ Նահանգներում» գիրքում։

«Գիրքը մեկ անգամ ևս արձանագրում է, թե ինչ ներուժ ունի հայ ժողովուրդը, եթե ապրում և արարում է ազատության, արդարության ու օրինականության պայմաններում»,–նշել է Ստեփան Պարթամյանը:

Հայ ճարտարագիտական մտքի առաջին արտոնագրված նմուշ է հանդիսանում 1908 թվականին ներկայացված և 1911 թվականին պաշտոնապես գյուտ ճանաչված Գաբրիել Կազանջյանի մազերի չորացման սարքը` այսօր համընդհանուր տարածում գտած և բոլորիս հայտնի «ֆենը»:

Տեխնիկական հեղափոխության իսկական հերոս կարելի է համարել Ցեղասպանությունից հրաշքով փրկված Ասատուր Սարաֆյանին, ով Ամերիկայում հայտնի է որպես Օսկար Բենկեր` առասպելական այն ճարտարագետը, ով հայտնագործել է ինքնաշարժերի ավտոմատ փոխանցման տուփը, որը 1940 թվականից կիրառվել է ամերիկյան «Օլդսմոբիլ» մակնիշի ավտոմեքենաներում:

Նույն Բենկեր-Սարաֆյանին են պատկանում ավտոսիրողներին քաջ հայտնի բենզինային պոմպի, ինչպես նաև ավտոյուղի չափիչի գյուտերը: Նա հանդիասանում է նաև բազմագույն տպիչ սարքի հեղինակը։

Ամենամեծ համբավ և տարածում ստացած գյուտերից է հանրահայտ Ալեք Մանուկյանի նորամուծությունը` յուրահատուկ տեսակի ջրի ծորակը, որը 1969 թվականից կիրառվում է աշխարհում:

Արժե հիշատակել նաև աստղաբաշխական քանակով արտադրվող Արտաշես Հայկանյանի հեղուկ խմիչքների համար նախատեսված  «կոկտեյլի փայտիկի» գյուտը։

Իսկ «բանկոմատի» մասին խոսելը նույնիսկ ավելորդ է, որի ստեղծումը պատկանում է Լյութեր Սիմիջյանին։ Ընդ որում, Սիմիջյանն առանձին արտոնագրել է ինչպես թղթադրամի, այնպես էլ` 1965 թվականին` մետաղադրամի համար նախատեսված բանկոմատի գյուտերը:

 1977 թվականին Միքայել Տեր-Պողոսյանը ստեղծել է կոմպյուտերային տոմոգրաֆիայի միջոցով մարդու մարմնի պատկերը վերարտադրող սարքը, ինչը հեղափոխություն կատարեց բժշկության ոլորտում։

Տեսեք թե ինչ կկորցներ աշխարհը , եթե չլինեին հայերը։ Ընդ որում սրանք միայն մի փոքր մասն են հայ հանճարեղ մտքի։