Հ. Թումանյանի տուն-թանգարանի տնօրեն Անի Եղիազարյանը նշում է, որ Թումանյանը սիրում էր համեղ ուտել, հաճախ էր իր տուն ընկերների և ծանոթների հավաքույթներ կազմակերպում և սեղանին դնում հաճախ իր իսկ բաղադրատոմսերով պատրաստված ուտեստներ: Ստորև առանձնացրել ենք 3 բաղադրատոմս, որոնք Թումանյանի սիրելիներից էին, և որոնց հեղինակը հենց ինքն էր:

Ընկույզով կոզինախ

 Անհրաժեշտ բաղադրիչներ

600 գր. ընկույզ

350 գր.մեղր

 9 ճ. գդալ շաքարավազ

 Կոզինախն արևելյան քաղցրավենիք է: Ամենից հաճախ կոզինախը պատրաստում են ընկույզից, որը միացնում են իրար մեղրի և շաքարավազի խառնուրդով: Դրանից հետո զանգվածից շերտ են ձևավորում, թողնում են սառչի և կտրատում են:
Կոզինախ կարելի է պատրաստել ընկույզից, քնջութից, գետնանուշից և այլն:

Պատրաստման եղանակ

Ընկույզները կեղևազրկել, սուր դանակով կտրատել, մաղել` թեփերից մաքրելու համար, թեթևակի բովել: Մեղրը շաքարավազի հետ եփել մարմանդ կրակի վրա այնքան ժամանակ (երբեմն-երբեմն խառնել), մինչև ստացվի միասեռ զանգված:

Ընկույզը լցնել խորը կաթսայի մեջ, ավելացնել հալեցված մեղրի և շաքարավազի խառնուրդը, գդալով լավ խառնել:

Հետո ստացված զանգվածը շրջել թաց տախտակի վրա և թաց գրտնակով գրտնակել և 1 սմ հաստությամբ շերտ ձևավորել: Մի փոքր սառելուց հետո կտրատել և հյուրասիրել:

 Քաղցրավենիքն այս հաճախ էր պատրաստում Թումանյանի դուստրը՝ Թամարը, և մատուցում այն թեյի հետ:

 Ագդակ

Անհրաժեշտ բաղադրիչներ

1 բ. ալյուր
1 ձու

50 գր կաթի սեր

1 թ. գ. սոդա

յուղ՝տապակելու համար:

Պատրաստման եղանակը

Հունցել խմորը, թողնել հանգչի 25-30 րոպե: Ապա խմորը բաժանել գնդերի: Դրանք գլորելով երկարացնել` տալով գլանի ձև, մի փոքր տափակեցնել, բաժանել 5 սմ կտորների և տապակել տաք յուղի մեջ: Վրան մեղր լցնել և մատուցել տաք վիճակում:

Նույն կերպ էր պատրաստում Թումանյան ընտանիքը՝  հատկապես Թումանյանի մայրիկը՝ Սոնան:

Թել պանիրով ձվածեղ

Անհրաժեշտ բաղադրիչներ

ձու

կարագ

թել պանիր

աղ, պղպղեղ

     Պատրաստման եղանակը

Անալի թել պանիրը (ջիլ) (կամ եթե աղ դրած է, նախապես 2 ժամ թողնում են ջրի մեջ) նախօրոք մանրացնում ենք: Թավայի մեջ լցնում ենք կարագ, այն դաղվելուց հետո ավելացնում ենք թել պանիրը և անընդհատ խառնում: Համասեռ մասսա դառնալուց հետո, ավելացնում ենք հարած ձու: Մատուցվում է տաք վիճակում:

Թումանյանները նախընտրում էին թել պանրի հետ խառնել նաև ռեժան, իսկ ձվի մեջ մանրացրած սպանախ ավելացնել: