«Ինչո՞ւ երեկ չասացիք, որ Դուք եք Տերյանը». գիտե՞ք՝ հայ գրողներից ում և ինչու չէր ասել, որ հենց ինքն է Տերյանը

Այդ հայ գրողը եղել է Վահան Թոթովենցը, ով փափագում էր տեսնել Վահանին:

Ձեզ ենք ներկայացնում մի հետաքրքիր պատմություն 2 Վահանների մասին, որը վերցված է Թոթովենցի հուշերից

  «Պետրոգրադում ինձ հետաքրքրում էր մի մարդ, մի երիտասարդ՝ բանաստեղծ Վահան Տերյանը,-պատմել է Թոթովենցը:

-Նրա բանաստեղծությունների գիրքը կախարդել էր ինձ: Անպարփակ էր հիացմունքս: Ժամ առաջ փափագում էի տեսնել այդ արտասովոր մարդուն, այդ կախարդին: Եվ կայարանում ինձ դիմավորած երիտասարդներին հայտնեցի փափագս:      
            Նրանք ինչ-որ բան խորհրդակցեցին: Հետո ինձ հայտնեցին, որ կառքը պատրաստ է, և ինձ կուղեկցեն մինչև հյուրանոց:      
            Ինձ ուղեկցողը շուրջ 30 տարեկան մի երիտասարդ էր ՝ լռիկ-մնջիկ: Նրան էլ ասացի, որ շատ եմ ուզում տեսնել Վահան Տերյանին, և որ Պետրոգրադում կանգ առնելու նպատակը նրան տեսնելն է:
            Այդպես հասանք հյուրանոց: Սենյակումս նորից կրկնեցի Տերյանին տեսնելու ցանկությունս: Ուղեկիցս դարձյալ հուսադրեց և ցտեսություն ասելով ՝ հեռացավ:      
            Մյուս օրը հրավիրված էի տեղի հայերի կազմակերպած մի հանդիպման: Հասնելուս պես դարձյալ հայտնեցի Վահան Տերյանին հանդիպելու ցանկությունս։
            -Բայց սիրելի պարոն,-դիմեց ինձ հավաքված ուսանողներից մեկը,- երեկ Դուք Վահան Տերյանի հետ կառքով հյուրանոց գնացիք, մենք որոշեցինք, որ նա Ձեզ ուղեկցի, որպեսզի ծանոթանաք:    
            Ես ապշեցի: Ինչպե՞ս թե, մի՞թե նա էր: 
            Քիչ հետո մի քանի հոգի ներս մտան: Նրանց մեջ ճանաչեցի երեկվա ուղեկցիս։ Խոսակիցս ասաց ահա՝ Տերյանը:          
            Գլուխս կորցրածի պես մոտեցա, ամուր գրկեցի նրա վտիտ մարմինը:    Համբուրեցի ճակատն ու հարցրի.         
            -Զարմանալի է…Ինչո՞ւ երեկ չասացիք, որ Դուք եք Տերյանը:         
            -Ճիշտն ասած,չէի ուզում Ձեզ հիասթափեցնել…»