Այս կինը ՀԱՐԵՄՈՒՄ գերության մեջ հայտնված ՀԱՅՈՒՀԻՆԵՐԻՑ Է. գիտե՞ք, թե ինչի համար էին նման դաջվածքները և ինչպես նա փրկվեց ստրկությունից

Լուսանկարում Այնթապի բնակչուհի Լյութֆիե Բիլեմջյանն է՝ 17 տարեկան:

Լյութֆիեն իր ծնողների և երկու եղբայրների հետ բռնագաղթել էր Դեր Զոր: Նրա մայրը զոհվում է երեխաներին պաշտպանելիս: Նրա հայրը և կրտսեր եղբայրը նույնպես սպանվում են, իսկ ավագ եղբայրն անհետանում է: Լյութֆիեն դառնում է չեչենի սեփականություն: Վերջինս էլ նրան վաճառում է մի քրդի, սա էլ աղջկան հանձնում է Մահմուդ փաշային՝ մի մեծահարուստ թուրքի, որի տանը Լյութֆիեն մնում է 11 տարի:

Հայոց ցեղասպանության ընթացքում բազմաթիվ հայ կանայք են ենթարկվել անմարդկային սեռական բռնությունների, վաճառվել ստրկության: Թուրքերը, քրդերն ու արաբները բռնագաղթի ճանապարհին հայ գաղթականների գիշերակացի ժամանակ հաճախ առևանգում էին գեղեցիկ կանանց ու աղջիկներին: Հարկադրված իսլամ ընդունած կանանց տալիս էին նոր՝ թուրքական անուններ: Երբեմն, համաձայն տեղի ցեղային ավանդույթների, այդ կանանց դեմքին ու մարմնին դաջվածքներ էին արվում: Միջին Արևելքում և իսլամական երկրներում դաջվածքները լայնորեն օգտագործվում էին որպես թալիսման և չարխափան. դրանք հաճախ կետերի կամ խաչերի տեսք ունեին, ցույց էին տալիս կանանց ազգային-կրոնական պատկանելությունը և նշում նրանց կյանքում կատարված փոփոխությունը:

hay kin haremum
Լուսանկարի աղբյուրը` Ազգերի լիգայի արխիվ, Ժնև

Ազգերի լիգայի պատվիրակ, ազգությամբ դանիացի միսիոներուհի Կարեն Եփփեն, համագործակցելով արաբական աշիրեթների առաջնորդների հետ, մինչև 1928 թվականը կարողանում է իսլամական գերությունից ազատել շուրջ 2000 հայ կանանց և երեխաների:

Նրա ջանքերով 1926 թ. մայիսի 18-ին փրկվում է նաև Լյութֆիեն:

Լոնդոնում Ֆրանսիայի ռազմական կցորդ գնդապետ դը Լա Պանուսը Ֆրանսիական բանակի գլխավոր հրամանատար գեներալ Ժոֆրիին ասել է.

«Նոյեմբերի 27, 1916 թ. Ստրկավաճառ շուկաները... Ճանապարհի երկայնքով, որտեղով անցնում են բռնագաղթյալները, կանանց համար ստեղծվել են ստրկավաճառ շուկաներ, որտեղ 12-ից 14 տարեկան դեռատի հայուհու գինը տատանվում է մոտավորապես 8-ից 23 ֆրանկի սահմանում: 

... Իսլամական աշխարհի այսպես կոչված «ինտելեկտուալները»` խոջաները, ուլեմները, քադիներն ու մուֆտիները, կարողացել են արագ օգտվել այդ հնարավորությունից»: