Այսօր տաղանդավոր հաղորդավարուհի Սուսաննա Շահինյանի ծննդյան օրն է. իմացե՛ք սիրված ՀԱՅՈՒՀՈՒ մասին ավելի մանրամասն

Հաղորդավար Սուսաննա Շահինյանը ծնվել է 1951թ. մայիսի 23-ին ՀՀ Սյունիքի մարզի Գեղանուշ գյուղում:

3 տարեկան հասակից բնակվում է Երևանում, որտեղ ավարտել է Շ.Ռուսթավելու անվան թիվ 23 միջնակարգ դպրոցը: 1968-74թթ սովորել է Երևանի պետական համալսարանի արևելագիտության ֆակուլտետի Իրանի պատմություն բաժնում: 1972թ-ից աշխատում է Հայաստանի հանրային հեռուստաընկերությունում` որպես հաղորդավար:

Սասուն Պասկևիչյանի հետ

Վարել է բազմաթիվ մանկական, երաժշտական, լրատվական, հասարակական հաղորդումներ` «Համայնապատկեր», «Լրաբեր», «Երաժշտական հանդիպումներ», «Շնորհալիները», «Երաժշտական փոստարկղ» և այլն: Հայկական հեռուստաընկերության ծրագրերը ներկայացրել է ԽՍՀՄ տարբեր երկրներում: Եղել է բազմաթիվ տոնական, պետական, հոբելյանական երեկոների հանդիսավար:

Նարա Շլեպչյանի և նրա ամուսնու հետ

1993-2004թթ բնակվել է Հոլանդիայում, որտեղ ավարտել է հոլանդերենի բարձրագույն քոլեջը, այնուհետև սովորել է տեղի Ֆիլմերի և հեռուստատեսության ակադեմիայում: Ղեկավարել է Դորթրեխթ քաղաքի «Անի» հայկական համայնքի գեղարվեստական բաժինը և եղել է Ամստերդամի «Աբովյան» մշակութային կենտրոնի գլխավոր համակարգողը ու փոխտնօրենը: Մոտ 5 տարի աշխատել է որպես հոլանդերեն, հայերեն, ռուսերեն լեզուների պետական երդվյալ թարգմանիչ:

2004թ-ից վերադարձել է Երևան և Հայաստանի հանրային հեռուստաըներության հրավերով շարունակել աշխատանքը: Վարում է «Երաժշտական փոստարկղ» հաղորդումը: 2011թ. արժանացել է Հայաստանի մշակույթի վաստակավոր գործչի կոչման, 2012թ.` ՀՀ սփյուռքի նախարարության ոսկե մեդալի` մայրենի լեզվի մաքրությունը պահպանելու համար: